غوجىمۇھەممەد، سەنمۇ كېتىپسەن!

“Ghojamuhammed“ئەزىز ئەيسا ئەلكۈن

 

ئاڭلاش: Elkun_poem/Ghojamuhammed.mp3

شېئىرنى رابىيە داۋۇت ئوقۇدى

 

(مەرسىيە)

 
غوجىمۇھەممەد، سەنمۇ كېتىپسەن،
بەلكىم ۋىسالغا ئەمدى يېتىپسەن …
بەلكىم مۇھەببەت كۆيدۈرمەس سېنى،
جەننەت پەرىسىگە جور بولۇپسەن!

 

غوجىمۇھەممەد، سەنمۇ كېتىپسەن،
قەدىردان شائىر، بىزدىن يۈتۈپسەن.
ئەلۋىدا دېيەلمىدۇق بىز ساڭا،
جۇدا ئوتىغا بىزنى سېلىپسەن.

 

غوجىمۇھەممەد، سەنمۇ كېتىپسەن،
شېئىرىڭنى ئەبەد يادىكار ئېتىپسەن،
مەشرەپتەك ھەقنىڭ كۈيچىسى بولۇپ،
ئۆلمەس روھلارغا روھلار قېتىپسەن!

 

غوجىمۇھەممەد، سەنمۇ كېتىپسەن،
ئاخىرقى قۇرنى قاندا يېزىپسەن،
مۇھەببەت – نەپىرەت ئالىمدە كۆيۈپ،
مىسكىن دىلغا مۇسىبەت سېلىپسەن !

 

غوجىمۇھەممەد، سەنمۇ كېتىپسەن،
ئاخىر جەننەتتە ئەركىن بولۇپسەن،
شئېرىڭ مەشئەل بوپ يانار چوغدەك،
ئەلكۈن قەلبىدىن ئورۇن ئېلىپسەن!

 

2018-يىلى 12- ئىيۇل، لوندوندا يېزىلدى.

 



1 باھا يېزىلىپتۇ. سىز تېخى باھا يازمىغان ئوخشايسىز... بۇ تېمىغا ئ‍ۆزىڭىزنىڭ قىممەتلىك پىكىرىنى يېزىپ كۆپچىلىك بىلەن ئورتاقلىشىشىڭىشنى ئارزۇ قىلىمىز!

  • گۈك زىيا | 08:36 | 2018.07.16 جاۋاب

    ئادالەت تۇغىنى كۆتەرگەن ئىنسان
    (غۇجىمۇھەممەت مۇھەممەتكە مەرسىيە)

    دەردىمىز ئۈستىگە دەرت كەلدى بىزگە،
    ئەنسىز يۈرەكلەر تىلغاندى يەنە.
    بۇ شالاڭ سەپلەردىن كەتتى بىر قىران،
    كەتتى بىر لاۋۇدەك ئوت يۈرەك يەنە.

    نەشتەردەك سۆزلىرى زۇلۇم كۆكسىگە-
    سانجالغان؛ خەلقىگە باغرىنى ئاچقان.
    ھەقنى دەپ كۆرەشكەن ھەقنى سۆزلىگەن،
    ئادالەت تۇغىنى كۆتەرگەن ئىنسان.

    مىليونلاپ قەلبلەر ئارزۇلىرىنى،
    ئەڭ نازۇك تىل بىلەن نىدا ئەيلىگەن.
    مىلتىقنى ئوقلاشقا ئىرادە قىلىپ،
    نا خوشلار قەلبىگە خىتاب ئەيلىگەن.

    لېكىن ئۇ كېتىپتۇ غەزەپ ئەلەمدە،
    لەختىلەپ زەردابقا تولۇپ يۈرىكى.
    ئارزۇلار ئارمان بوپ قېپتۇ بىزلەرگە،
    غوجا مۇھەممەدنىڭ ئارزۇ تىلىكى.

    بۇ يوللار بەك ئۇزۇن، مۈشكۈلات يوللار،
    ئىرادە، سەۋرىمىز يېتەر نىشانغا.
    ئاي يۇلتۇز كۆك تۇغنى قادايمىز چۇقۇم،
    ئۇ ياتقان زېمىننىڭ چوققىلىرىغا .

    ئالماس ھاجى 2018-07-15

سەھىپىمىزدە پىكىر يازغاندا ئۇيغۇر تىلىنىڭ ئۆلچەملىك ئىملا قائىدىسىگە رىئايە قىلىشىڭىزنى تەۋىسىيە قىلىمىز !