jawabsiz qalghan téléfon

“Hepizikhaneziz eysa elkün

eserni anglash: Jawabsiz_Qalghan_Telefon.mp3

 

quyash parlighan seherde bük- baraqsanliq derexler arisidiki qushlarning wichirlap sayrashliri kishige bügünki bu bir künningmu biz arqimizda aldirash qaldurup ketken herqandaq bir kündin qélishmaydighan, qimmetlik hayat öz menisini kamaletke yétip ipadileydighan, güzellikke we ehmiyetlik demlerge tolidighan yene bir yap yéngi bir künning bashliniwatqanlighidin köngullerni mestxush qilatti.

 
men ushbu minutlarda shundaq bir rohluq keypiyatta idimki kichik qizimni qolidin yétilep, uninggha dunya heqqide qiziq we güzel hékayilerni éytip bergech, uni aldirash mektepke élip kétiwatattim. piyadiler yoli xélila tar bolghachqa adette uch adem teng yandiship mangalmaytti. eger aldimizda birer adem astaraq kétip barghan bolsa, u ademning aldigha ötüp yolingizni tizrek dawamlashturushingiz üchün «merhemet, kechürüng, manga yol bergen bolsingiz!» digendek tekellup geplerni qilip yol sorishimiz kérek idi.

 
teliyimizge bizning aldimizda bowaq harwisi ittirip, méning qizim bilen teng yashtiki bir kichik qizni bille élip kétip barghan bir yash ayal uchurdi. bu ayalni men bir qanche yillardin buyan tonuyttim. bu ayal a’ilisi bilen méning qizim ikkinchi sinipta oquwatqanda bizning mehellige Fransiyening nis (Nice) shehridin köchüp kelgen idi. bu ayalning qizi bilen méning qizim shuningdin buyan bir sinipta oqup kéliwatatti. bu ayalning ismi lusié (Lucie) bolup, milliti fransuz idi. biz adette uchriship qalsaq tekellupluq salam – sa’etlirimizni ayashmayttuq.

‫yashqa tolghan shehla köz‬

“Yashqaeziz eysa elkün

 

anglash: Yashqa_tolghan_shehla_koz.mp3

eserni asiye uyghur oqudi
 

‫bedölet zamanidin tartip bashqa yurtlargha tonulushqa bashlighan, tarim boyliridiki bük-baraqsan toghraqliqlar arisigha jaylashqan bu xilwet yurt, özining teb’iy alahidiliki bilen «talliq»1  dep atalghan idi. bu talliq yézisigha tewe bir qanche mehelle kentler peqet pesiller boylap köchüp yuridighan qum barxanliri bilen bir-birliridin ayrilip turatti. bu yurttiki ademlerning hemmisi bir-birliri bilen tughqan . bu yurtta bir-birlirini tonumaydighan yaki yaqa yurtlardin köchüp kélip qalghanlar yoq diyerlik. asimaxun mana mushu yurtta katta emeldar we bay bolup otken qasim shangyoning2  kenji oghli bolup, yurt chonglirining dep bérishiche mushu yurtning ayiqida «azat zaman» östingi chépilghan yili 1950-yili «pomishchik», «bay déhqan», «hakimiyetke qarshi unsur» dégendek qalpaq keydurulup, sazayi qilinip, kéyin nahiye bazirigha apirilip qasim shangyoni onnechche baylar bilen bille étiwetken iken. awwal atisidin, kéyin apisidin kichik yitim qalghan asimaxunni kichik apisi béqip Qatargha qoshqan. asimaxun yétimlikning, ata-anisining méhrisiz köp yuqsuzliqlarni tartip chong bolidu. u penniy mektepte oquyalmaydu emma mehellining mollisida uch yil «heptiyek»3  oqup pensirdin sawatini chiqiridu. ‬

 

‫mehellilerde dashqazan tüzümi «kommuna»4  qurulghan yillardin bashlap taki bu tüzüm 1980-yilliri emeldin qaldurulghiche u 4-mehellining «maxochisi»5  bolup ishligen idi. shunga mehellidikiler uni bezide «asim maxo» depmu chaqirishatti. asimaxun kommunada uzun waqit kenitning at-ulaqlirini baqqanliqi nezerde tutulup, omumning mülkidin bashqilar Qatarida bir éshek harwigha, bozluqtin on mo yer teqsimatigha érishken idi.‬

men shé’ir yazmidim

Men shier yazmidimeziz eysa elkün

 

eserni biwaste anglash: Men_Shi’er_Yazmidim_Elkun.mp3

 

men shé’ir yazmidim
shé’ir méni yazmaytti,
chünki biz qiydiship qalduq.
köp chékitler qoyulghan ikkimiz arisigha
sükütke teqdir bizni baghlaytti!

 

men shé’ir yazmidim
shé’ir hem méni yazalmaytti,
chünki héslirimiz bughulghan
tizilghan misralar buzulghan …
arimizda asman bilen zémindek keng
boshluq tughulghan,
baharni uzaq kütken güllirimiz axir
échilmayla tozughan!

 

men shé’ir yazmidim
shé’ir méni yazalmaytti,
chünki bizning tuyghumiz –
muhebbitimiz
ghorurimiz
kechmishimiz …
bizge tewe hemme nersiler oghrilan’ghan,
qaraqchilar qarangghu kochida
bizge tuydurmay turup
hemmini yoshurup satqan!