‏ xeyrlik dunya

eziz eysa elkün
Xeyrilik dunya

 

xeyrlik dunya!
her kün séni söyüp tughuldum
séningdiki jimi bar nersini-
ay, kün, yultuz, tagh, derya, déngiz …
shunga söyüp hem söyülup yashaymen!
chünki men adem!

 

shunga her nepeste
her seherde
men insanliqni küyleymen,
harmaymen…
özini adem dégenlerdin-
bir qoshuq adimiylikni tileymen!

 

2017- yili, 3- öktebir. london.

özlükni chüshnish

eziz eysa elkün
“Bir

 

ademlerning özini we özgilerni chüshineligen eqil idrak bilen yashishimu zor bir bexittur. ademler dunyasini alimidin nadin’ghiche, dehrisidin supisighiche, ashiqidin meshuqighiche, béydin gadiyghiche, hetta shahidin bir burda nanni tilep ara tépip yéyelmeydighan qelendirigiche güzel dep teriplishidu. belkim bu rastur, belkim bu yalghandur weyaki her ikkilisidur emma hich bir munazire telep qilـmaydighan bir heqiqet shuki her bir ademning bu dunyani özi üchün güzel yaki deshti chöl qilip yaritishi shu kishining öz méhnitidin sorilidighan soraqtur.

 

gahida hayat musapimizde zamanning zari bilen xoshalliq we qayghuning nöwiti almiship qara közimizdin sirghip chüshüp turidighan yashlar yürkimizning chongqur qatlirida bizge hich yoshurmastin nurghun heqiqetlerni pichirlap turidu. uni sizdin bashqa hich bir kishi sézelmeydu yaki tartip alalmaydu. démek bu yerdiki gep del sizde shundaq pichirlap, yürkingizdin éytiliwatqan insanliqning chin heqiqitini éniq angliyalighidek sezgür bir jüp qulaqning bar yaki yoqlighidur chünki biz ademler herqanche yawayilashmayliki, herqanche rehimsizleshmeyliki, her qanche shermendileshmeyliki biz hemmimizning bu dunyagha ademiy méhri ـ muhebbet bilen kelgenlikimizdek,  bi’ologiyilik géin tariximiz qelbimizde her deqiqide bizge yürikimizning soqush rétimi bilen teng xatirlinip turidu, shunga biz deymiz shuning üchünmu biz ademdurmiz.

 

2016 ـ yili 5 ـ öktebir.

 

bir botulka su

eziz eysa elkün
 

“Bir

meyin shamalgha harmay usul oynap könüp ketken bulutlar xuddi naz qizdek gahi köngli yérim bolup yighlisa, gahi xushluqi tutup téliqip kületti, gahi chaghda qapiqini turup domsiywélip, quyash nurini dümbisi bilen tosup mökü – möküleng oynaytti. towa, bulutlarmu ademlerning mijez-xulqini ögünuwaldimu néme, ishqilip men bügün shundaq ghelite bir tuyghulargha qelbimni mestxush qilghach munglinip olturup, dérizidin déngizning chékige nezer tashlayttim. malmodin (Malmö) kopénhagén’ge tiz kétiwatqan poyiz oresand köwrükining (Oresund Bridge) tomur baldaqlirini bir -birlep arqisida qaldurup aldigha uchqandek chapatti. kök asmanning kök renggini özige eynen köchürwalghan baltiq déngizning asminidin shungghup chüshken bulutlar be’eyni su ustide leylep yürgendek bir körünüshni hasil qilatti. köz aldimdiki bu güzel menzire küz aylirining béshidiki aptapliq, hawasi ochuq shimaliy yawropa ellirining teb’iy güzelliklirige mujessemliship, xuddi bir parche meshhur klassik may boyaq resimdek teswirini namayan qilatti.

 

mana mushundaq tebi’etning güzellikige tolghan bu güzel dunya biz ademlerning yashishigha mensup idi. biz bu yerge esli derd elem tartish üchün emes, közimizdin issiq qan – yashlirimizni töküsh üchün emes, belki xoshal – xuram, méhri – muhebbet bilen yashashqa kelgen iduq. yéshim chongiyip, eqlim qolumgha nésip bolghan bu yillarda adem balisining tughulghinigha néme üchün yighlaydighinini, andin yene néme üchün bashqilarning yighisi bilen hayatini axirlashturidighanliqini chüshinishke bashlighan idim. adem hayatining  musapisi mana mushu ariliqtiki muhebbet bilen nepret, rahet bilen musheqqet, erkinlik bilen qulluqning nispiylik chembirikide keskin küresh qilidiken. bulardin qaysi biri sizning hayatingizda üstünlükni igilise u sizge tewe bolidiken. siz özingizge tewe bolmighan qismi üchün bolsa bir ömür, taki özingizde yoq nersige érishküche küresh qilip yashaydikensiz. éhtimalim, bu belkim ademlerning bu dunyada yashash pisxikisi bolsa kérek.