atijan

eziz eysa elkün

ئاتىجان

eserni biwaste anglash: Atijan.mp3

 

atamning wapatigha béghishlaymen.
(mersiye)

 
uchti ömür baghidin yoruq bir yultuz,
perishte jennet tilep durut oqudi.
tawutini kötürüshtin mehrum elkün,
«atijan» dep bügün mersiye toqudi …

 
sen tikken aq térek yalingach bolup,
bu küzde ghazanglar chüshkende sen yoq.
barangda üzümler sarghiyip piship,
bolghanda mey bir tal yéyishke sen yoq!

 
qotanda qoy merep séni soraydu,
yem bérerige chéwer qolung emdi yoq.
xorazmu matemde, sükütlük seher,
qaldi öyüng turuksiz emdi sen yoq!

 
qaplidi asminimni mudhish bulut,
zar kütken nijat quyashi bügün yoq.
sen nurluq ay iding qelbimge yan’ghan,
tün boldi bu künum körerge sen yoq!

yopurmaq

eziz eysa elkün

كۈزدىكى سېغىنىش

jut qish qoghlidimu yupurmaq séni,
üzüldung waqitsiz téningdin juda.
yaki dap chaldimu sanga shamallar?
üchtung bügün makansiz bolup sewda…

 

jut qish qoghlidimu yupurmaq séni,
tang seherde hijran naxshisi éytip.
kézermen wisal tughqan bu kochini,
nepsimge séghinish héslirini qétip.

 

jut qish qoghlidimu yupurmaq séni,
sarghiyip rengging yéshildin tönügün.
bolmighin emma sen hijran’gha elchi,
xazandek tozumisun söygü bügün!

 

jut qish qoghlidimu yupurmaq séni,
sarghiyip altundek hösin – jamaling.
ketseng ger peslini perwasiz izdep,
kökligin gülüm bolup baharda méning?!

 

29 öktebir, 2017- yili. london

 
 

yürikim yansa meylimu?

eziz eysa elkün

يۈرىكىم يانسا مەيلىمۇ؟

shé’irni anglash: Yurkim_yansa_meylimu.mp3

shé’irni kündüz’ay hamut oqudi

 

pesilning rengliri tökülgen demler,
uchmidi xazandek hayattin kimler,
musibettin aqsaq éghir qedemler,
pighandin yürikim yansa meylimu?

 

sükütte men seher derya boyida,
bezmige chüshken qushlar dan koyda,
chögiler tügmendek dunya oyumda,
azabtin bu yürek köyse meylimu?

 

qarghaylar asman’gha qarap sep tartqan,
tagh bashigha tumanlar upuq yapqan,
wadilar sarghiyip yalingach yatqan,
xazan bolup ömür ketse meylimu?

 

tarimdiki altun küzini men séghinip,
toghraq yapriqidek küzde sarghiyip,
tengri söygen kökke iltija qilip,
hayat ötüp ketse turay meylimu?

 

pesil bilen tuyghum tughulup tursa,
söygüm bilen nepret küreshke tolsa,
külkem bilen yigham ayrilmas bolsa,
pighandin bu yürikim yansa meylimu?

 

su yüzide leylep aqar yupurmaq,
eksim titrep turar üstide biraq,
qoyulghan hayatqa séhirlik soraq,
elkün pighandin ölse meylimu?!

 

16-öktebir 2017- yili, london.