ئوتتۇرا دېڭىزدا ئىزگۈ ئىستەكلەر

Ottura dengiz tilek

ئەزىز ئەيسا ئەلكۈن

شېئىرنى بىۋاستە ئ‍اڭلاش: Ottura_dengizda_izgu_tilekler.mp3

 

كۈن چۈشكەن بېشىغا يانار تاغلىرى،

مۇسسولىننىڭ پۇتى كۆيگەن دېڭىز.

يېمىشكە تولغان بوستان باغلىرى،

سوقۇلغان تاش قورغىنى ئەڭ ئېگىز.

 

بېلىجانلار سەييارە دېڭىزدا شوخ – شوخ،

شاراپ تەمى ئىدىشتىن كەتمىگەن يوقاپ.

بىر جۇپ گەۋدە ساھىلدا دۇنيادىن بىھۇش …

مۇھەببەت كۈيى ياڭراق دولقۇنلۇق شۇتاپ.

 

يالتىرار كۆمۈش رەڭدە بويالغان سۇلار،

قىزىرىپ كەتكەن ئۇپۇقتا سۆيگۈ يەلكىنى.

ئاھۇ ۋولقان باغرىدا بەختى يوق تاغلار،

تەۋرىتەر بۇ زېمىننى ھەر بىر سەلكىنى.

 
[تولۇق ئوقۇش]

ئاشىقلار ھېكايىسى قۇلۋاقتا غېرىب،

قانچە بوۋاق تۇغۇلدى ئارال ئۇستىدە…

قانچە جانلار ئارمىنى دېڭىزغا غەرق،

ياش تۆكەر قارا بۇلۇت زېمىن يۈزىگە.

 

چېركاۋنىڭ قوش مۇنارى قىلىدۇ ئىسيان،

سۆيگۈ ئىلاھى غەمكىن سۈكۈتكە پېتىق.

شاھلاردىن قالغان مىراس قەدىمكى قورغان، 

ئۇ سۆزلەر يوشۇرماستىن ھەقىقەت ئېيتىپ!

 

رەڭگە تولغان تار كوچا قەلئەگە تۇتاش،

ھەر قەدەمدە قەشقەرنى ئېسىمگە سالار.

لەغمىنى ھەم گۆش نانلىرى بىزگە ئوخشاش،

ئەنجۈرلىرى ئاتۇشنىڭ قىشمۇ ياز پىشار.

 

ئوتتۇرا دېڭىزدا لەيلەر ئىزگۈ ئىستەكلەر،

چۆل ئوغلى قەلبىگە سىغماس ئارمان تولدۇرۇپ.

سورىماستىن مەيىن شامال يۈزۈمنى سۆيەر،

تەڭ مېنى قۇياش بىلەن دېڭىزغا چۆمۈدۇرۇپ.

 

شاھىددۇر مىڭ تارىخقا بۇ ئارال شۇ دەم،

رىملىقلار سەلتەنەتى بولسىمۇ گۇمران.

ئەلكۈن ئىستەر بۇ يەردىن تەسەللى بىر دەم،

تەۋە بولۇپ تارىمغا ياشىسىمۇ ھامان!

 

2016- يىلى 20 – سېنتەبىر

كالىئارى، ساردىنىئا ئارىلى، ئىتالىيە

 

 

شېئىرنى سۈرەت شەكلىدە ئوقۇش ۋە ساقلىۋېلىش ئادېرىسى:

http://www.azizisa.org/img/Ottura_dengiz_tilek_w.jpg

 

 بۇ شېئىر ئېنگىلىز تىلىغا تەرجىمە قىلىندى. ئۇلنىش ئادېرىسى:

http://www.azizisa.org/en/hopes-float-on-the-mediterranean

 

شېئىرنى باغداش تورى مۇنبىرىدىن ئوقۇش:

http://bbs.bagdax.cn/thread-72559-1-1.html

 



سەھىپىمىزدە پىكىر يازغاندا ئۇيغۇر تىلىنىڭ ئۆلچەملىك ئىملا قائىدىسىگە رىئايە قىلىشىڭىزنى تەۋىسىيە قىلىمىز !