музика

““Music“”әзиз әйса әлкүн

 

бәәйни түндики җин ғиңшип нахша ейтивақандәк
ғува бир музика қулиқим тувидә аңлинивататти
пәризимчә у конирап кәткән бир пианинодин келиватиду.
бәлким бу музикини бир ақ чачлиқ момай челиватиду
чүнки у яшлиқидики надамәттә қалдурған ашиқини сеғинди …
бу музика аста – аста пәнҗиридин өмләп кирмәктә
«хош кәлдиңиз» дедим мән өз-өзүмгә
«сиз роһимға чүшкән чүшкүнлүкни тазлияламсиз?» дәп сорудум
у җавабән аһаңлирини техиму ләрзан яңритишқа башлиди…

 

музикиниң мискин қәлбләрни сақайталайдиғанлиқиға ишинимән
муңлуқ музика шаирларға лирика йезиш пурситини бериду
у шундақ сап, шундақ биғубар, шундақ ақ көңүл,
у кишләргә һисдашлиқ қилишнила билиду
у сизниң бурун йоқутуп қойған гүзәл әслимилириңизни қайтуруп келиду.

кечә әрваһи

“Kecheәзиз әйса әлкүн

 

аңлаш: Elkun_poem/Keche_erwahi.mp3

шеирни рабийә давут оқуди

 

мән кечә әрваһи, мени азаблиған вақит оғурлирини издәватимән
дунядики барлиқ оғриланған вақитни һесаблаватимән …
хумалашқан көзүмгә компийотер екранидики саәт лондон вақти 12 ни көрсәтти
бәлким париж вақти һазир әтигән саәт 1 болди, берлин вақтиму һәм охшаш …
үрүмчи вақти қанчә болди? алтай, қәшқәр, ғулҗа, хотәндәк шәһәрләрниң вақтичу?
бешкәк, алـмута, қазан, ташкәнт, ашхабадниңчу?
дүшәнбә, һират, теһран, истанбул вә рияд вақтличу?
хоңкоң, баңкок, токйо, ниюйорк, чикаго чу?
әмма бу дәқиқидә, мән бу қурларни йезиватқан вақтимда
уйғур үчүн «үрүмчи вақти» дәп аташ җинайәт һисаблинивататти…

ғоҗимуһәммәд, сәнму кетипсән!

“Ghojamuhammed“әзиз әйса әлкүн

 

аңлаш: Elkun_poem/Ghojamuhammed.mp3

шеирни рабийә давут оқуди

 

(мәрсийә)

 
ғоҗимуһәммәд, сәнму кетипсән,
бәлким висалға әмди йетипсән …
бәлким муһәббәт көйдүрмәс сени,
җәннәт пәрисигә җор болупсән!

 

ғоҗимуһәммәд, сәнму кетипсән,
қәдирдан шаир, биздин йүтүпсән.
әлвида дейәлмидуқ биз саңа,
җуда отиға бизни селипсән.

 

ғоҗимуһәммәд, сәнму кетипсән,
шеириңни әбәд ядикар етипсән,
мәшрәптәк һәқниң күйчиси болуп,
өлмәс роһларға роһлар қетипсән!

 

ғоҗимуһәммәд, сәнму кетипсән,
ахирқи қурни қанда йезипсән,
муһәббәт – нәпирәт алимдә көйүп,
мискин дилға мусибәт селипсән !

 

ғоҗимуһәммәд, сәнму кетипсән,
ахир җәннәттә әркин болупсән,
шериң мәшәл боп янар чоғдәк,
әлкүн қәлбидин орун елипсән!

 

2018-йили 12- июл, лондонда йезилди.